Бүген Буада урманчылар сөйләште: урман турында законнар космик тизлектә үзгәрә

"Буа урманы" дәүләт учреждениесе территориясендә урманчылар катнашында узган зона семинар-укуларында Урман министрлыгының структур подразделениеләре җитәкчеләре, "Рослесинфорг" учреждениесе вәкилләре, шулай ук "Буа урманчылыгы" , " Тәтеш урманчылыгы" "Кайбыч урманчылыгы", "Ислейтарск урманчылыгы", "Яшел Үзән урманчылыгы", Идел буе урманчылыгы" "Шәһәр яны урманчылыгы" учреждениеләренең җитәкчеләре урынбасарлары, инҗенерлары, участок урманчылары катнашты. Алар яңалыкларны өйрәнү белән бергә проблемаларны уртага салып сөйләштеләр.

ТР Урман министрының беренче урынбасары Әмир Бәдертдинов үз чыгышында законнарга бик еш үзгәрешләр кертелүен, алар белән даими кызысынып, өйрәнеп торырга кирәклеген ассызыклады. Аннан соң, урманнарда соңгы елларда янгыннар чыгу проблемасына тукталды. Урманчыларга яңа таләпләр турында территорияләр өчен җаваплы затларга да җиткерергә кушты.