Буа районы башлыгы Ранис Камартдинов авыл хуҗалыгы сезонының башлангыч нәтиҗәләрен ясады.
Аның сүзләренчә, районда бөртекле культураларны урып-җыю эшләре төгәлләнеп килә — мәйданнарның 97%ында эшләр башкарылган. Барлыгы 185 мең тонна ашлык суктырылган, уртача уңыш гектарыннан 36 центнер тәшкил итә. Бу — төбәк өчен искиткеч күрсәткеч.
Көзгы культураларны чәчү дә төгәлләнеп килә: аграрийлар якынча 13 мең гектар мәйданны чәчкәннәр, бу планның 95%ын тәшкил итә. Һава шартлары аркасында чәчү эшләре гадәттәгедән соңрак башланса да, шытымнар куандыра.
Район башлыгы шикәр чөгендере уңышын билгеләп үтте. Бу культураның уңышы барлык көтелгән нәтиҗәләрдән дә арткан — гектарыннан 600 центнердан артык, ә шикәрлелек күрсәткече рекордлы дәрәҗәгә — 16%тан артыкка җиткән. Әлегә шикәр заводына 110 мең тоннадан артык тамыразык озатылган.
Йөгерү (кукуруз) нәтиҗәләре дә тәэсирле: яшел массаның уңышы гектарыннан 400 центнердан югарырак булган.
Шулай да, эшләр кыенлыкларсыз гына бармый. Туфракның артык дымлы булуы сәбәпле, техника кайбер җирләрдә басуга керә алмый. Шуңа да карамастан, аграрийлар урып-җыюны вакытында төгәлләү өчен һәр кояшлы көнне нәтиҗәле файдаланалар.
Нет комментариев