Буа табиблары барысын да җиңделәр (фоторепортаж)

Буа үзәк дәваханәсе табиблары волейболда, аркан тартуда, шахматта, эстафетада республикадагы коллегалары арасында иң көчлеләре. Алар моны Казанда медицина хезмәткәрләре спартакиадасында катнашып, авыл районнары арасында гомумкоманда исәбе буенча иң күп очко туплап исбатладылар. Республиканың төрле районнарыннан һәм шәһәрләреннән 14 команда арасында финалда безнекеләр җиде тапкыр Диплом белән бүләкләнделәр. Ир-егетләр волейболда, канат тартуда, шахмат ярышында беренчелекне бирмәделәр. "Швед эстафетасы", теннис ярышларында егетләр икенче, аркан тартуда, "Швед эстафетасында" хатын-кызлар өченче булдылар. "Олимп" спорт комплексында пъедесталның беренче баскычын буалылар биләде, икенчедә - Балык Бистәсе районы, өченчедә - Алексеевск медицина хезмәткәрләре.