Буалыларны мошенник-экстрасенслар “дәвалаганнар”

Ике очрак та шушы көннәрдә генә теркәлде.

Район эчке эшләр бүлегеннән алынган мәгълүматларга, шәһәрдә яшәүче 1956 елгы хатын-кыз бер телеканалдан астрология темасына багышланган тапшыру карый һәм төрле авырулардан дәваларга булышучыларның экранда күрсәтелгән телефон номерларына шалтырата. Элемтәгә кергән мошенник-экстрасенслар аңа терелергә ярдәм итәчәкләрен әйтәләр һәм әлеге хезмәт күрсәтүнең түләүле, 20 мең сум торуын искәртәләр. Хатын-кыз аларның исәбенә әлеге сумманы күчерә. Шуннан соң мошенниклар аның белән элемтәгә кереп, телефон аша "дәвалыйлар". "Сеанс" тәмамлангач, хатын-кызның туганнарына да булышырга әзер икәнлекләрен әйтәләр.

Икенче очракта да 1976 елгы буалы шул ук тапшыруны карап алдана. Анысы мошенникларга мәхәббәт "өчпочмагыннан" зарланган. Алдарлар хатын-кызның тел төбен сизеп алып, аңа өеңдә "бозык" бар дип 30 мең сумнан күбрәккә "эшкәрткәннәр".

Бу фактлар буенча тикшерү бара.