Чын ат тиресе белән бахбай, тарантас һәм борыгы татар стилендә тормыш

Шәһәрнең Көнбатыш бистәсенең Дала урамында яшәүче ирле-хатынлы Дания Сәйфетдинова һәм Фаязнур Насретдинов ел саен өй алларындагы территорияне әкияткә әверелдерәләр. Бер елны анда “Шалкан” әкияте персонажлары “яшәгән”, узган ел көянтәле-чиләкле Кыз. Ә быел алар татарның борынгы тормышын күрсәтергә уйлаганнар. Чын ат зурлыгындагы ат карачкысына тире тегеп кигезеп, аңа тарантас такканнар. Анда бәбие белән татар хатынын утыртканнар, ә ире зуррак баласы белән янәшәдә. Әлеге композицияне Насретдиновлар Гаилә елына багышлаганнар. Өлкәннәргә ярдәмгә балалары, оныклары да килә.

Хәзер буалылар әлеге матурлыкны күрергә махсус йөриләр. Алар Дания апа үстергән чәчәкләргә сокланырга  да килә.