Гадәттән тыш хәлләр министрлыгы: Татарстанда урман янгыннары чыгу ихтималы зур

(Казан, 7 май, "Татар-информ"). Татарстанда 8-10 май көннәрендә урманнарында урыны белән югары янгын куркынычы көтелә.

Россия Гадәттән тыш хәлләр министрлыгының Татарстан буенча Баш Идарә матбугат хезмәте халыкка янгын булган очракта, түбәндәге киңәшләр буенча эш итәргә куша:

- Бетми торган янган ис, томанга охшаш төтен, кошлар, хайваннар һәм бөҗәкләрнең үзләрен борчулы тотышы, бер якка күчүе, офыкта төнге кызыллык - болар барысы да янгын билгеләре була ала.

- Урманда чыккан янгын утның кырыйларын һәм очларын яфраклы агачлар белән каплау, йомшак туфрак ату һәм ялкын телләре хәрәкәт иткән юлда киң каналлар казу юлы белән сүндерелә.

- ут торак пунктка якынлашкан очракта, аннан халыкны эвакуацияләргә кирәк - иң беренче чиратта, балаларны, хатын-кызларны һәм картларны куркыныч урыннан алып китү сорала. Эвакуацияне янгын хәрәкәтенә перпендикуляр юнәлештә, юл һәм елга буйларыннан гына башкарырга кирәк.

- урман янгынына тап булган кеше рельефның иң биек урынына менәргә, ут чыккан урынны эзләп табырга тиеш. Шулай ук якын-тирәдәге сулыклар һәм кешеләр яшәгән урыннарга игътибар итү киңәш ителә.

- әгәр сез урманда зур булмаган утка тап булсагыз, аны шунда ук сүндерү чараларын күрергә һәм шул ук вакытта, мөмкинлек булса, берәрсен якындагы торак пунктка яки урманчылыкка ярдәм артыннан җибәрү мөһим.