Буада төлкеләрдә котыру чиренә каршы вакцина тараттылар +фото

Моың өчен "Рабивак-О/333" вакцинасы кулланыла. Аны район дәүләт ветеринария берләшмәсе белгечләре дәүләт ветеринария инспекциясенең Апас территориаль бүлекчәсе һәм аучылар җәмгыяте белән берлектә тараттылар. Берләшмә директоры урынбасары Айнур Исхаков әйтүенчә, алдавыч брикетларны төлкеләр, сукбай этләр күп йөргән урыннарга - 1 квадрат километрга 25 брикет исәбеннән районның барлык авыллары тирәләренә, урманнар, кыр ышыклау полосалары янына, чокырлы урыннарга куйганар. 7 көн үткәннән соң ул урыннар вакциналарның ашалуын ачыклау максатында кабат тикшерелә. Аларның төлке организмына эләгүен бер ай үткәч ачыклаячаклар. Аучылар 10 төлкене атып алачаклар һәм алар лабораториягә тикшерүгә җибәреләчәк.