Быел хоккей буенча дөнья чемпионы кемнәр булачак? Буалылар фаразы

Бүген кич 21 сәгать 45 минутта хоккей буенча дөнья чемпионатының финалы була - чемпион кубогы өчен Россия һәм Канада җыелма командалары көч сынашачак. Исәп ничек булачак, җиңү кемгә елмаячак бүгенге матч турында буалыларның фаразлары нинди? Менә, берничә кешенең фикере. Ә Сез ничек уйлыйсыз?
Вазыйх Садыйков. Карлы авылы:
- Күңелем белән бик теләсәм дә, бүген безнекеләрнең җиңә алуына шикләнәм. Канада командасы быел аеруча көчле. Кичә дә безнекеләр америкалылар белән соңгы периодта гына чынлап уйнадылар. Безнең саклаучылар мактарлык түгел. Ә бүген исәп канадалылар файдасына 4 : 2 булыр, дип уйлыйм. Күңел, билгеле, безнекеләрнең җиңүен тели.
Рәис Якупов. Буа шәһәре:
- Безнекеләр җиңәчәк, тик голлар күп булмас. Знарок командасы көчле.
Илдар Әхмәдуллин. Татар Буасы авылы:
- Россия командасы тәгаен отачак. Баштагы уеннарда безнекеләр авыр уйнады. Әмма соңгы ике матчта нәрсәгә сәләтле икәнлекләрен күрсәттеләр. Бигрәк тә Овечкин уены ошады.

Ленар Әхмәтҗаноа. Васильевка бистәсе:
- Канада уенчылары безнекеләрне көч кулланырга этәрергә тырышачаклар. Мондый провокацияләргә бирешмәсеннәр иде, Шул чакта без отабыз.Безнең потенциал бар. Исәп безнекеләр файдасына 3 :2 булыр дип торам.