Буада автоледи велосипедчы егетне бәрдерде һәм качты

Район ЮХИДИ бүлекчәсеннән алынган мәгълүматларга караганда, бу хәл кичә кичке 4нчеләрдә Яшел һәм Болын урамнары чатында була. Төп юлдан баручы "Деу Матиз" автомобиле әлеге урамнар чатына җиткәч, 18 яшьлек велосипедчы да юлга чыга. Нәтиҗәдә руль артында 1983 елгы хатын-кыз булган "Деу Матиз" аны бәрдерә дә юл-транспорт һәлакәте урыныннан качып китә. Тик велосипедчы автоледины да, аның кара кызыл төстәге автомобилен танып кала. Берникадәр вакыттан соң "Деу Матиз" кире борылып, каршы як полосадан килгәндә, ул аны танып якыннарына тизрәк шалтырата, алары бу хакта ЮХИДИ хезмәткәрләренә хәбәр итәләр. Егет өйдә, үзен яхшы хис итә, ул җиңел дәрәҗәдәге тән җәрәхәтләре алган.