Буа районы башлыгы Ранис Камәртдинов шәһәр мәктәпләрендә робототехника дәресләрен карады (фото)

Роботлар ясау буенча өстәмә дәресләрне алып баручы педагоглар белән аралашты. Район мәгариф идарәсеннән алынган мәгълүматларга карганда, укучылар арасында роботлар белән кызыксынучы укучылар саны арта. Шуңа бәйле рәвештә район җитәкчелеге тәкъдиме белән шәһәрдә һәрбер мәктәптә 1-4 һәм 5-9  сыйныфлар өчен өстәмә дәресләр оештырылган. Шулай ук бу эш мәктәптән тыш эшләр үзәгендә дә актив алып барыла. Ранис Рафисович, һәрбер мәктәптә аеруча нинди юнәлештә эш алып барулары, балаларның фикерләре белән аерым кызыксынды.

- Агымдагы елда шәһәр мәктәпләре өчен барлыгы 84 комплектта, 13 миллион сумлык робототехника җыелмалары сатып алынды. Бу укучылар мәктәптә укыганда ук  әлеге өлкә белән турыдан-туры танышсын, өйрәнсен өчен эшләнә.  Чөнки замана мәктәп яшеннән профессиональ ориентлашуны таләп итә. Белгәнебезчә, роботлар, автоматлаштыру кебек хезмәт базары һәрвакыт белгечләр таләп итә. Һәм киләчәктә дә әлеге өлкәдә хезмәт куючыларга һәрвакыт сорау зур булачак. Без эшне башлап җибәрдек, инде беркүпме нәтиҗәләр дә бар. Мәктәптән тыш эшләр үзәге конкурсларда җиңү яулый. Без укучыларның алга табан илебезгә кирәкле белгечләр булып үсеп җитүләре өчен барысын да эшләргә тиеш,  - диде район башлыгы.

Район газетасы һәм сайтының киләсе саннарында мәктәпләрдә булып, укучыларның ни белән шөгыльләнүләре турында аерым сөйлиячәкбез.