Буа районы Иске Суыксу Сабан туена быел да Фирдүс Тямаев белән узачак. Тагын Раяз Фасихов, Илмира Нәгыймова, Филүс Каһиров, Азат һәм Алсу Фазлыевларның да килүләре көтелә.

Телефоннарда Иске Суыксу авылында быел да Сабан туе узачагы турында хәбәр халык арасында инде таралып өлгерде. Әлеге бәйрәмне оештыручыларның берсе булган Мөнип Хөсәеновтан бәйрәм турында тәфсилләбрәк сорашып алдык.

-Быел Сабан туе узган елгыдан һич кенә дә кайтыш булмаячак. Иске Суыксу авылы янындагы алан һәркемне көтеп калачак. Бәйрәмне оештыручылар  бу хакта инде яз башыннан  сөйләшүләр алып баралар. Төрле уеннар, ат арбасына капчык-капчык иген төяп тарту, лотерея уеннары –  барысы да булачак. Узган ел көрәшчеләр тәкә һәм  скутерлар белән бүләкләнгән иделәр. Иске Суыксу көрәшчеләр тәрбияләүче авыл. Җитәкчеләр быел да Сабан туе йөзе булган көрәшчеләр мәйдан күрке булачагын ышандыралар. Ә төсле утлар белән балкучы зур сәхнәдә дистәләгән татар-башкорт эстрадасы артистлары чыгыш ясаячак. Фирдүс Тямаевны Иске Суыксу Сабан туена әлләкайчан “кодалап” куйганнар авыл егетләре. Әйткән сүз, аткан ук,  Тямаев – киләчәк.