Буа районының биш авыл җирлегенә тракторлар кайтарылды

Бу – дәүләт ярдәме. Татарстанның муниципаль берәмлекләр Советы аша республика казнасыннан бүлеп бирелгән икешәр миллион сумлык грант акчасына алынган. Адав-Толымбай авыл җирлеге башлыгы Азат Әхмәтҗанов белдерүенчә, трактор бик кирәк иде. Әлегә кадәр өч авылдагы – АдавТолымбайдагы, Ивашевкадагы, Яңа Авылдагы үләннәрне чаптырырга, кышын кардан чистартырга шәхси тракторы булучыларны гозерләгәннәр. – Рәхмәт, тыңладылар. Тик һаман аларга әйтеп булмый, болай да баш тартмадылар, үз ягулыкларын ягып ярдәм иттеләр. Хәзер, яңа трактор булгач, бу проблема хәл ителде, - диде Азат Фазылҗан улы. Яңа тракторга печән чаптыргычны, кар чистарткычны алырга да дәүләт ярдәм итәчәк. Анысы да республика бюджетыннан финанслана. Бер-ике айдан алары да кайтартылачак, дип көтәләр. Ә хәзергә авылда юл ремонтлау эшләре бара. Монысы үзара салым акчасына башкарыла. Толымбайлылар өчен стратегик тыкрыкны – авылның Кооператив һәм Яшел урамнарын тоташтыручы сазлык урынны таш түшәп юллы итәләр. Бу юлдан Буага, зиратка чыгып йөриләр. – Авыл җирлегендә юллар ремонтланып бетте диярлек. Шул тыкрыкларны гына төзекләндереп җибәрәсе бар. Киләсе елларга аларны да эшләп чыгарга исәп тотабыз, - диде Азат Әхмәтҗанов.