Буа Сабан туенда кайсы ат абсолют беренче килде?

Беренче заезд кече яшьтәге юртаклар арасында узды. Наил Хәлиловның шәхси аты Чингизханга, Илсур Галимҗанов фермер хуҗалыгының Экспрессына 1600 метр араны йөгереп үтәргә 2 минуттан күбрәк вакыт кирәк булды. Соңгысы финишка беренче булып килде. Исхаков Илсурның Красавчик айгыры һәм дәүләт конюшнясының Александрия биясе арасында ярыш киеренке барды - нәтиҗәдә бия көндәшеннән 2 секундка алданрак килде. Калган заездларда да тәҗрибәле юртаклар катнашты. Өченчесендә Илсур Галимҗановның үзе иярләгән Легионер айгыры Александр Пыркин иярләгән Храбрый (Алексей Кубайкинныкы) айгырына оттырды. Дүртенчесендә дәүләт конюшнясы атлары - Водопад кушаматлы айгыр Майя исемле бияне күпкә артта калдырып, беренче булып килде. Юртаклар арасында соңгы бишенче заезд Алексей Кубайкин фермер хуҗалыгындагы атларга бирелде .

Аннан ярсып йөгерекләр стартка чыкты. Монда жокее Станислав Макаров булган Меридиан айгырына тиңнәр булмады. Быел юртаклар арасында финал заезды уздырылмады, җиңүчене иң аз вакыт эчендә финишка килүчеләр арасыннан билгеләделәр. Шулай итеп быелгы район Сабан туеның абсолют җиңүчесе - Алексей Кубайкинның Акцент айгыры булды. Хуҗага 10 мең сум акча бирелде. Калган призлы урыннар алучылар да акчалата бүләкләргә ия булдылар.