Буада беренче чөгенднер олаулары килде. Быел татлы тамыр уңышы ничек? (фоторепортаж)

Районның "Ак Барс" холдинг агрофирмалары хуҗалыкларыннан һәм "Дружба" агрофирмасының 3 номерлы бүлекчәсеннән төяп китерелгән олаулар җиңел кулдан беренче булып кабул ителделәр. Тантанада катнашкан район җитәкчелеге һәм дин әһелләре сезонның авырлыкларсыз тәмамлануын теләделәр. Уңыш быел яхшы күренә ди, хуҗалар. "Дружба" агрофирмасы кырларыннан аның чыгышы гектарына уртача 380 центнер тәшкил итә. Чөгендернең шикәрлелеге 16,52 процент. Быел шикәр заводы барлыгы 900 мең тонна татлы тамыр кабул итәчәк. Шуның 650 мең тоннасын агрофирмалардан кабул итәчәкләр, ә калганын фермерлар, шәхси хуҗалыклар китерер дип көтелә.