Буада коточкыч фаҗига булды

1988 елгы буалы ир-ат бергә яшәүче 1982 елгы буалы хатын-кызны берничә тапкыр пычак белән кадап, явызларча үтерә. Буа районара тикшерү бүлеге биргән мәгълүматларга караганда, үтерүнең төп сәбәбе ир-атның көнләшүе аркасында була. Алар хатын-кызның квартирасында бергә яшәгәннәр. Гаиләдә ике арада еш кына тавыш чыга торган булган. Шул көнне ир өенә алкоголь кулланган килеш кайта. Ике арада тагын гауга куба. Шуннан ул хатынны үтереп, квартирадан чыгып китә. Күршеләр, ирнең урамга чыккач үзен сәер тотуыннан шикләнеп хокук саклау органнарына хәбәр итәләр. Һәм тикшерүчеләр килеп үлем фактын теркиләр. 37 яшьлек ир моңа кадәр дә кеше үтерүдә гаепләнгән була. 2010 елда Казан шәһәренең Авиатөзелеш районы суды тарафыннан бу гамәле өчен 10 елга хөкем ителә һәм үз срогын тутырып иреккә чыга. Хәзерге вакытта кабат кулга алынды. Аның тарафыннан эшләнгән чираттагы җинаять факты буенча эш кузгатылды, тикшерү бара.