Анда Татарстан Республикасы Авыл хуҗалыгы һәм азык-төлек министры Марат Җаббаров, Татарстан Республикасы Дәүләт Советы депутаты Ринат Гайзатуллин, “Ак Барс” холдинг компаниясе генераль директоры Иван Егоров та катнаштылар. Хезмәтчәннәргә рәхмәт һәм тәбрикләү сүзләрен беренче булып муниципаль район башлыгы Ранис Камәртдинов җиткерде. Үз чыгышында ул агымдагы елда ирешелгәннәр турында бәян итте. 242 мең тонна ашлык суктырып алган район быел да тулай җыем күләме буенча республикада алдынгылар рәтендә. Бөртеклеләрнең һәр гектардан уртача чыгышы 42,4 центенр тәшкил итте. Көнбагыш һәр гектардан 31, бөртек өчен кукуруз 80,7 центнер уңыш бирде. Шикәр чөгендерен уртача 515 центнер чыгыш белән 451 мең тонна җыеп алдылар. Ит, сөт җитештерү буенча да күрсәткечләр начар түгел. Килгән кунаклар да районның республика күләмендә алдынгылар арасында булуын ассызыклап, алга таба лидерлыкны саклап калуны теләделәр. Һәр чыгыш уртак уңышка өлеш керткән хезмәт алдынгыларын бүләкләү белән үрелеп барды. Аларга Дәүләт бүләкләре, Мактау грамоталары, Рәхмәт хатлары тапшырылды. Эстрада артистлары башкаруында җырлар бәйрәмгә аерым бер ямь өстәде.