Буалыларны кисәтәләр: түбәдән карны төшермәсәң, штраф түләү ихтималы бар

Шул сәбәпле бәхетсезлек очраклары килеп чыкмасын өчен җәяүлеләрнең андый йортлар диварларына якын килмәве сорала. Шулай ук кар, боз төшү ихтималы булуын кисәтүче тасмалар куелган урыннарга эчкә үтмәгез. Бу куркыныч зона, дигән сүз. Балаларга да бу урында йөрүнең, уйнауның хәтәрлеген аңлатыгыз.

Буа районы административ комиссиясе, үз чиратында, түбәдән кар, боз ишелүне булдырмау максатында профилактик эш алып бара. Авыл җирлекләре башлыкларына, идарәче компанияләр оешма-предприятиеләр, учреждениеләр җитәкчеләренә  аларны үз вакытында төшерүне оештырырга куша. Түбәләрне җәяүле зонасына чыга торган яктан чистартканда әлеге участок кисәтүче тасма белән әйләндереп алынырга һәм чистарту бары тик тәүлекнең якты вакытында башкарылырга тиеш. Хәтта бер урыннан чистарткан очракта да,  түбәдә калган карның, бозның кабат төшүе мөмкин. Бу очракта урынны кабат алардан арындырырга кирәк.

Район хакимиятенең административ бүлек начальнигы Рөстәм Хәбибуллин белдеүенчә, гадәттә, җаваплы затлар түбәдән кар төшерү турында беренче кисәтүдән соң берничә көн эчендә моны эшлиләр.  Ә башкармаган өчен штрафлар каралган. Гражданнарга 2 мең сумнан 3,5 мең сумга, вазифаи затларга 15 мең сумнан 30 мең сумга кадәр, юридик затларга 200 мең сумнан 500 мең сумга кадәр. Бу хәл кабатланса, штраф суммасы ике тапкыр арта.