Бүген Буа районы мәчетләрендә Ураза гаете намазы укылды. Күл Черкене авылында ремонттан соң мәчет ачылды

Бүген районның барлык мәхәлләләрендә мөселманнар Рамазан ае тәмамлану уңаеннан ураза гаетенә килде. Район мөхтәсибәте халыкны гает, аңа килү тәртипләре вакыты турында алдан хәбәр итте.
Барлык мәчеләрнең дә  ишекләре ачык иде. Күл-Черкене авылында капиталь ремонттан соң агач мәчет ачылды. Авылда ике мәчет эшли, әлеге мәхәлләгә йөрүче халык яңартылган мәчеткә килде. Әлеге шатлыкны халык белән район башлыгы Ранис Камәртдинов та уртаклашты.
- Дини йортларыбызны яңарту, аңа керткән көчебез киләчәктә һичшиксез үзебезгә яхшылык белән әйләнеп кайтачак ул. Моның белән балаларыбызның күңелләренә мәрхәмәт салабыз. Илләрдә тынычлык урнашып, мәчетләр динебезгә, халыкның бердәмлегенә, көчле булуына хезмәт итүен телим. Бәйрәм белән котлыйм, Ураза гаете саулык, гаиләләрегезгә тынычлык, бәрәкәт алып килсен, - диде ул.

Бүген Татарстанда ял көне.