Даша Сайкина Буаның “Арктика” бозында шөгыльләнүче фигуралы шуучылар төркеме “копилкасына” беренче Алтын медаль китерде

2 номерлы лицейның 7 сыйныфында  укый. Беренче карашка оялчан,  мөлаем бала, икенче карашка...  шушы  юка гәүдәгә күпме үҗәтлек һәм рух ныклыгы сыйган.

Моннан бер ел элек кызы Даша авызыннан: “Әни, мин фигуралы шуучылар төркеменә язылыйм әле”, - дигән сүзләрне ишеткәч, Наталия Анатольевна бермәл уйга кала: боз, тимераяклар, кыз бала. Ни булмас?!  Әмма шуны яхшы белә: Даша сигез яшьтән тимераякларга басарга хыялланган кызчык. Юк, баланың теләгенә каршы килергә күңеле бармый ананың. “Арктика” боз сараена документлар һәм гариза илтергә  әниле-кызлы баралар.

Шуннан бирле Дашаның көндәлек расписаниесе сәгатьләп бүленгән: дәресләр, аннары тренер Виолетта Маратовна  җитәкчелегендә күнегүләр, бозда шуулар, яңа элементлар өйрәнүләр. Ялыктыра, арыла, егылудан аяклар-куллар күгәрә.  Әмма Даша һәр яңа тренировкага яңа үҗәтлек белән килә.  “Ласточка” ясау, “винтель” әйләнү, “тулуп”, “аксель” – башка кызлар нәрсә турында сөйләшәләрдер, әмма Дашаның даирәсендә бу сүзләр һаман әйләнеп тора.

- Минем “ласточка” ясау, “кораблик”, “колечко”, “сальхов” яхшы килеп чыга. Әмма сикерүләрдә азрак “косякларны” бетерергә кирәк, - дип матур итеп елмая ул.  Тренер Виолетта Вәлиуллина исә шәкертен профессионалларча бәяли: пластикасы, сыгылмалыгы, пөхтә эшләве, фигуралы шууны чын-чынлап яратуы Дашаның өстен яклары, ди.  Беренче тапкыр республикакүләм ярышка “Яз бәйрәме” фестиваленә алып киткәндә дә сигез шуучысы арасында Даша Сайкинага да зур өмет баглый ул.

- Мин  бик дулкынландым. Үземне кулга алырга тырыштым. Беренче урынга минем исемемне игълан иткәч, башым әйләнеп китте, шатлыгымнан сикердем. Дөресен әйткәндә, мин максимум өченче урын турында хыялланган идем, - дип эч серен бүлешә фигуралы шуучы.  Хәзер төркемдә ул инде “чемпион” титуллы.

Әнисе исә Дашаның уңышлы дебюты өчен бер сөенсә,  кызында күнегүдән-күнегүгә мөстәкыйльлек, җаваплылык кебек сыйфатларның көчәюенә дә шатлана.

- Ничектер үсеп киткән кебек тоела, җитдиләнде. Сеңелесе Ульяна да апасы артыннан  фигуралы шуа башлады, - ди әни. Ә  күнегүләрдән соң Даша кул эшләре белән утырырга ярата. Мәсәлән, чыгышлар өчен әнисе белән сайлап алган күлмәкләргә ул үз куллары белән сәйләннәр тезә, бизи.  Ә башында хәзер яңа хыяллар. Аларның иң зурысы - бозда фигуралы шуу буенча Мәскәү дәрәҗәсендә  җиңү яулау.

Илсөяр Мөхәммәтҗанова.