Гер спорты буенча Россия чемпионы булган буалы Кирилл Ляукин Һиндстанда узачак дөнья чемпионатына әзерләнә

Ул 10 минут эчендә озын цикл буенча герне 81 тапкыр өскә чөйде. Ул быел  Һиндстанның Нью-Дели шәһәрендә узачак дөнья чемпионатында Россия данын яклап катнашачак. Ярышның шарты буенча катнашучы герны 75 тапкырдан аз булмаган санда чөяргә тиеш.

Бу спортчы якташыбызның беренче җиңүе генә түгел икән инде. Кирилл 2024 елда Кыргызстанның Чолпон Ата шәһәрендә узган дөнья чемпионатында яшьләр арасында (двоеборье, в/к 63 кг) чемпион булуга ирешкән.  Ике ел рәттән – 2024 елда  Россия чемпионатында көмеш, 2025 елда бронза призеры булган.

Кирилл Ляукин һөнәре буенча тренер, шәхси эш белән  дә шөгыльләнә. Новосибирскта узган Россия чемпионатына кадәр ул дүрт ай Буага кайтып  “Импульс” спорт комплексында шөгыльләнгән. Без чемпион белән телефон аша элемтәгә кердек. Ул Буаның 2 номерлы лицее чыгарылышы булуын һәм балачагыннан  “Батыр” спорт мәктәбендә футбол уйнап үтүен әйтте. Инде бер тапкыр дөнья чемпионы булган якташыбыз Буада спортка мәхәббәт тәрбияләгән укытучыларын рәхмәт сүзләре белән искә алды. Футбол буенча тренеры Ринат Садыйковны һәм мәктәптә физкультура укытучысы Рафаэль Сәйфетдиновны рәхмәт белән искә алды.

-Мин спортка мәхәббәт тәрбияләгән укытучыларыма рәхмәтле. Башта спортның авыр атлетика төренә тартылдым. Аннан гер күтәрү спорты буенча тренер белән шөгыльләнә башладым. Бүген  мин Россиянең атказанган тренеры Михаил Трофимов кул астында шөгыльләнәм, - диде ул.

Россия чемпионы әле безне интригалап та куйды – Буа Сабан туена кайтам, диде.