Иделдә бер-бер артлы унга якын балыкчыны коткарган буалы коткаручылар бозга чыгарга ярамавын кисәтә

Беренчесендә Кама Тамагы районында балык тоткан Чүпрәле районыннан һәм Казан шәһәреннән булган дүрт балыкчы, кайтыр вакытлары җиткәч, су күп җыелган боздан кире ярга чыгып җитә алмаганнарын аңлап, ярдәм сорыйлар. Коткаручылар аларны табып, Тәтеш пристанена чыгарган һәм полиция хезмәткәрләренә тапшырган. Балыкчылар медицина ярдәменнән баш тарткан.

Икенче очракта Ульяновск өлкәсеннән килгән һәм Тәтеш районының Пролей-Каша тирәсендә балык  тотучылар араларында берсенең хәле авырлашуы һәм аңын югалтуы турында хәбәр итәләр. Аларны эзләргә чыканнан соң бер сәгатьтән табып алалар. Дүрт исән һәм бер үлгән балыкчыны Тәтеш причалына алып чыгып, полиция һәм “Ашыгыч ярдәм” хезмәткәрләренә тапшыралар.

Дүрт көн эчендә ике тапкыр балыкчыларны коткарган коткаручылар  язгы бозга чыгу гаять куркыныч булуы турында кабат кисәтәләр. Моның берничә сәбәбе бар. Елга өстендә әле боз торса да, аның структурасы үзгәрә. Кояш нурлары тәэсирендә бозның ныклыгы кими, аның астында су куышлыклары барлыкка килә. Боз нык булган вакытта да куркыныч урыннар бар. Аларга, мәсәлән, күперләр асты, шулай ук бозланган кар белән капланган участоклар керә. Бер кеше авырлыгы өчен ун сантиметрдан ким булмаган калынлыктагы тигез, ярыксыз, зәңгәрсу яки яшькелт төстәге боз куркынычсыз санала. Яз көне бозның башка төсләре куркыныч билгесе булып тора.