Мөкерле авылы күленә кем җәтмә салган? (+фото)

"Зөя буйлары" дәүләт табигать тыюлыгы хезмәткәрләре "Уылдык" операциясе барышында Мөкерле авыл җирлеге территориясендәге күлдә балык эләктерү өчен куелган дүрт җәтмәгә юлыгалар. Балыкчылар закон буенча әлеге ысул белән балык тотарга ярамаганны белә. Тик кем кулы уйнаганны әлегә билгесез. Табигать заказнигы директоры Илнур Гыйбадуллин белдерүенчә, 15 апрельдән алып 15 июньгә кадәр барган "Уылдык" операциясе кысаларында закон бозу очрагы бүтән теркәлмәгән. Тик электр кармагы белән мавыгучылар булуын белә хезмәткәр һәм закон бозмаска чакыра. Мондый фактка юлыкканда гражданнарның җаваплылыкка тартылачаклары турында кисәтә.