«Наше время – Безнең заман» фестиваленең беренче зона этабында җиңүчеләр билгеләнде

«Фестивальнең Чаллыда узган беренче зона бәйгесе 200дән артык катнашучыны җыйды. Алар үз талантларын «Хореография», «Музыка» һәм «Дан минуты» номинацияләрендә күрсәтә алды. Гомумкоманда хисабында катнашкан 6 команда Суперфиналга чыкты», дип хәбәр итә фестивальнең матбугат үзәге.

Бу исемлеккә «КамАЗ» ААҖ (Чаллы), «KAMA TYRES» предприятиесе (Түбән Кама), «Аммоний» АҖ (Менделеевск), Түбән Кама районы башкарма комитетының мәгариф идарәсе, Мамадыш районы башкарма комитетының мәгариф бүлеге һәм СИБУР-«Нижнекамскнефтехим» (Түбән Кама) предприятиеләренең үзешчән коллективлары һәм артистлары кергән.

Суперфиналга чыгучылар 500 мең сум күләмендә гран-при өчен көрәшә алачак.

Чаллы этабындагы гала-концертта катнашучыларны Чаллы башкарма комитеты җитәкчесе урынбасары Рамил Хәлимов, Татарстан Рәисе каршындагы Мәдәниятне үстерүгә ярдәм фонды башкарма директоры Нурия Хашимова, шулай ук, Татарстан Республикасы сәнәгать һәм сәүдә министры урынбасары Иван Колчин, республиканың Профсоюзлар федерациясе рәисе урынбасары Марат Гафаров һәм башка рәсми затлар сәламләгән.

«Фестивальдә катнашучылар – беренче булырга омтылган бик талантлы яшьләр», - дип ассызыклаган Рамил Хәлимов һәм үз хезмәткәрләренең иҗади үсеше өчен шартлар тудырганга предприятиеләр, профсоюз оешмалары җитәкчеләренә рәхмәт сүзләрен белдергән. Чаллы башкарма комитеты җитәкчесе урынбасары «Наше время – Безнең заман» генераль продюсеры Дмитрий Тумановның фестиваль хәрәкәтен үстерү буенча тырышлыкларын аерым билгеләп үткән.

Татарстан Республикасы сәнәгать һәм сәүдә министры урынбасары Иван Колчин: «Республика бүгенге буын төзиячәк киләчәккә ышаныч белән карый. Фестивальдә катнашучылар – бу яңа буынның өлеше», - дип белдергән.

Профсоюзлар федерациясе рәисе урынбасары Марат Гафаров ассызыклаганча, «Наше время – Безнең заман» – үз ишендәге бердәнбер фестиваль. «Заводлардан, предприятиеләрдән, оешмалардан килгән гади яшьләр безгә чын бәйрәм бүләк итә», - дигән.

Коллектив әгъзалары хис-кичерешләрен журналистлар белән уртаклашкан. «Һәр нәрсә дә без уйлаганча килеп чыкты», - дип белдерган «КамАЗ» вәкиле Ирина Никитина. СИБУР-«Нижнекамскнефтехим» командасында катнашучы Наил Мөбарәкшин: «Үзебез алдында гына түгел, команда алдында да җаваплылык тотабыз. Шуңа күрә үз сәләтеңне 100% түгел, ә 200% күрсәтергә кирәк», – дигән.

«KAMA TYRES» предприятиесе хезмәткәре ,физик-механик сынаулар буенча лаборант Альбина Баһаветдинова фестиваль атмосферасын искиткеч уңай итеп бәяләгән. «Безнең бердәм, дус командабыз югары дәрәҗәдә чыгыш ясады», - дип ассызыклаган ул.

• Быелгы фестивальнең приз фонды 4 млн сумны тәшкил итә. Гран-при иясе 500 мең сум күләмендә акчалата бүләк алачак, «Безнең заман герое» махсус призы иясе 350 мең сум алачак. Фестивальнең җиңүче командалары һәм лауреатлары кубоклар белән бүләкләнәчәк.
• Киләсе зона этабы Әлмәттә 13-14 октябрьдә узачак. Ә йомгаклау этабы Казанда 20-21 октябрьдә була. Зона турлары лауреатлары һәм җиңүчеләре 17-18 ноябрьгә планлаштырылган фестивальнең суперфиналында катнашачак һәм Казанның Идел буе дәүләт физик культура, спорт һәм туризм университетының Концерт залында үзләрен күрсәтәчәк. Төп җиңүчеләрне 20 ноябрьдә Казанның «Пирамида»сында игълан итәләр.
• 2013 елда Татарстан Республикасы Яшьләр эшләре министрлыгы һәм Татарстан Республикасы сәнәгать һәм сәүдә министрлыгы тарафыннан оештырылган «Наше время – Безнең заман» фестивале ЮНЕСКО эшләре буенча Россия Федерациясе комиссиясе эгидасы астында һәм Татарстан Республикасы Рәисе Рөстәм Миңнеханов ярдәме белән уза.