Буа районы башлыгы үзәкләштерелгән җылылык системасыннан кулланучы йорт хуҗалары мөрәҗәгате буенча хәлне урынга барып өйрәнде

Шәһәрдә күпквартиралы йортта яшәүчеләр әлеге сорау белән Ранис Камәртдиновка шәхси кабул итүгә килгәннәр. Ул бу хакта социаль челтәрләрдә хәбәр итә. Яшәүчеләр аңа әлегә кадәр  үзәкләштерелгән җылылык системасыннан өзүләре турында белдергәннәр.  Йортны җылылык белән тәэмин итүче предприятие авыр финанс хәл белән бәйле рәвештә башка бу эшне башкара алмаячагы билгеле булган.

Ранис Камәртдинов районда җылылык белән тәэмин итү профиленә караган оешма-предприятиеләр җитәкчеләре белән берлектә урында яшәүчеләр белән очрашкан. Белгечләр хәлне  якыннанрак өйрәнгән. Нәтиҗәдә хәл уңай хәл ителгән: әлеге йорт хуҗалары тагын бер сезон җылылык белән үзәкләштерелгән системадан тәэмин ителәчәк. Шул вакыт эчендә яшәүчеләр индивидуаль җылылык системасына күчүне документлаштырып бетерәчәкләр.

- 2028 елда җылылык сезонына кадәр барлык сораулар да хәл итеп бетерелергә тиеш, - дип белдергән Ранис Камәртдинов.