Буа районының Яңа Чәчкаб авылында Илсур Зиннуровны соңгы юлга озаттылар

Матәм митингы сугышчының туган авылы — Яңа Чәчкабта узды. Хушлашу авыл мәчете янында үтте. Ватан сакчысына соңгы хөрмәтне күрсәтер өчен аның туганнары, якыннары, дуслары, авылдашлары һәм хакимият вәкилләре җыелды.

Илсур Гайсә улы Зиннуров 1989 елның 30 мартында туган. Илебез мәнфәгатьләрен яклау өчен кыю карар кабул итеп, ул Россия Федерациясе Оборона министрлыгы белән контракт төзеде һәм хәрби хәрәкәтләр зонасына китте. Соңгы сулышына кадәр ул антка һәм хәрби бурычына тугры калды.

Һәлак булган сугышчының гаиләсенең авыр кайгысын уртаклашырга Буа муниципаль районы башлыгы Ранис Камартдинов, Буа районы хәрби комиссариаты вәкилләре, район ведомстволары җитәкчеләре һәм авыл җирлекләре башлыклары килде.

Митингта чыгыш ясап, район башлыгы Ранис Камартдинов Илсур Зиннуровның туганнарына һәм якыннарына тирән кайгы уртаклашуын белдерде:
«Бүген без чын ир-егетне, илебезнең тыныч киләчәге өчен җаваплылык алырга курыкмаган патриотны соңгы юлга озатабыз. Илсур Гайсә улы мәңгегә безнең йөрәкләрдә батырлык һәм ныклык үрнәге булып калачак. Без сезнең белән бу авыр югалту кайгысын уртаклашабыз. Герой турындагы истәлек мәңге яшәячәк».

Җыелучылар һәлак булган сугышчыны бер минутлык тынлык белән искә алдылар. Герой белән хушлашу барлык хәрби хөрмәтләр күрсәтелеп үткәрелде.

Быел башыннан Буа районы юлларында 6 кеше һәлак булды

Буада юл йөрү кагыйдәләрен саклау буенча киңәшмә узды.

Аны район башкарма комитеты җитәкчесе Ленар Шакирҗано алып барды. Төп доклад белән район ГАИ бүлекчәсе начальнигы Алмас Кәримов чыгыш ясады. Ул райондагы юлларда булган хәлләр турында сөйләде. Быел 9 ай эчендә район юлларында 6 кеше һәлак булган.