Районда гриппка каршы вакциналашу кампаниясе бара

Үзәк дәваханәнең табиб-эпидемиологы Резедә Җәләлова сүзләренә караганда, районда “грипп” диагнозы куелган очраклар юк, бары ОРЗ һәм ОРВИ гына. Ел башыннан 1080 кеше чирләгән. Авыруның көзге сезоны август аенда ук башланган.

– Быел грипп августтан алып март аена кадәр барыр, дип фаразлыйбыз. Салкын тию симптомнары белән килүчеләрне ОРВИмы, әллә коронавирусмы икәнен ачыклар өчен тест үткәрәбез. Шул рәвешле генә кешегә ОРВИ яки ковид диагнозы куела, - диде Резедә Вадимовна.

Табиб грипп, коронавирус белән көрәшүнең төп юлы – вакцинацияләү, ди. Ул  район халкын шәһәрнең 2 номерлы поликлиникасына прививкалау кабинетына чакыра.

Моннан тыш, табиб иммунитетны ныгыту юлларын әйтте. Күбрәк С витамины кергән ризыклар – әфлисун, мандарин, киви, карлыган кайнатмасы, укроп һәм башкалар. Сәламәт яшәү рәвешен алып бару да зарур.