Татарстанда «ФИЗРА» үзәкләре 95 процентка әзер

Объектлар «Россия спорты» дәүләт программасының «Бизнес-спринт (Мин спортны сайлыйм)» федераль программасы кысаларында шәхси инвестицияләр җәлеп итеп сафка бастырыла. Бу хакта Татарстанның Спорт министрлыгы матбугат хезмәтендә хәбәр иттеләр.

«Безгә спортның зур шәһәрләрдә яшәүчеләр өчен генә түгел, ә район үзәкләрендә яшәүчеләр өчен дә үтемле булуы мөһим. Әлмәттә һәм Чаллыда төзелгән, шулай ук Казанда һәм Яшел Үзәндә төзелеп килә торган комплекслар – меңләгән кеше өчен өе янында гына уңайлы шартларда спорт белән шөгыльләнү мөмкинлеге. Дәүләт һәм бизнес бергәләп Татарстан халкын физик культура белән шөгыльләнергә һәм сәламәт яшәү рәвеше алып барырга этәрә», – диде Татарстан Республикасы спорт министры урынбасары Алмаз Хөсәенов.

Хәзерге вакытта объектларда төзелеш-монтаж эшләре тәмамланган диярлек, 2026 ел ахырына кадәр файдалануга тапшыру планлаштырыла. Ике проектның да инвесторы – «ФИЗРА» компаниясе. Бер комплексның гомуми бәясе 350 млн сум тәшкил итә. Киләчәктә халык футбол, волейбол, баскетбол һәм көрәш кебек спорт төрләре белән шөгыльләнә алачак.

Бу Татарстанның дәүләт-хосусый партнерлык механизмын кулланып проектларны гамәлгә ашыруда беренче генә тәҗрибәсе түгел. 2023-2024 елларда шул ук сценарий буенча Әлмәттә һәм Чаллыда шундый ук ике «ФИЗРА спорт үзәге» комплексы төзелде һәм файдалануга тапшырылды.

Татарстан илдә спорт объектларын төзү өчен дәүләт-хосусый партнерлыгы механизмнарын актив куллана башлаган төбәкләренең беренчеләреннән булды. Бу төбәк һәм муниципаль бюджетларны артык йөкләмичә, халык өчен якын-тирәдә генә заманча спорт инфраструктурасы булдырырга мөмкинлек бирә.

Тулырак: https://tatar-inform.tatar/news/tatarstanda-fizra-uzaklare-95-procentka-azer-5926200