Буа укучылары планшетлы һәм смартфонлы булды (+ фото)

Укучыларга аларны Казанның Иннополис университетында Татарстан Президенты Рөстәм Миңнеханов, Мәгариф һәм фән министры Энгель Фәттахов, Мәгълүматлаштыру һәм элемтә министры Роман Шәйхетдинов катнашында узган "IT-чемпион-2015" республика конкурсының I һәм II этапларында җиңүчеләрне бүләкләү тантанасында тапшырдылар. Буадан планшетлы компьютерларга лицей-интернатның 3 сыйныф укучысы Эльвина Дәүләтшина, Ырыңгыда 5 сыйныфта белем алучы Карина Егорова, Боерган мәктәбенең 10 сыйныф укучысы Анна Малышева, смартфоннарга икенче этапта җиңүчеләр - М. Вахитов исемендәге гимназиянең 7 сыйныф укучысы Ильяс Җәләлов, Ташкичүдә 9 сыйныфта укучы Адилә Хисаметдинова, Түбән Наратбашта 7 сыйныфта белем алучы Инсаф Вәлиев ия булдылар. "Иң актив мәктәп" номинациясендә Ташкичү мәктәбе (директоры - Ф. Фәткуллин) җиңү яулады һәм профессиональ дисплейлы "Samsung" телевизоры белән бүләкләнде.