Бүген Исәк авылында традицион «Уйнагыз гармуннар» бәйрәме узды

Әлеге бәйрәмне үзенең туган авылында якташыбыз, Казан шәһәрендәге Буа якташлыгы җәмгыяте җитәкчесе Ирек Закиров белән  җәмгыять активистлары бергә  оештыра. Дистә еллар дәвамында авыл уртасындагы мәйдан Исәк авылы халкын гына түгел, тирә-як районнардан һәм чит төбәкләрдән дә кунакларны җыя. Чөнки ул авыл бәйрәме булып кына калмыйча, гармунда уйнаучы җырга-моңга гашыйкларны да берләштерә. Быел да мәйдан түрендә кулларына гармун тоткан егетләр һәм кызлар бәйрәмнең йөзе булдылар.

Кунакларны иң беренче район башкарма комитеты җитәкчесе Ленар Шакирҗанов сәламләде һәм ул әлеге бәйрәм белән мәдәниятебезне, гореф-гадәтләребезне, телебезне сакларга ярдәм иткән якташларыбызга рәхмәт сүзләре ирештерде. 
- Бүген авылдашлар, дуслар, туганнар белән очрашырга бер сәбәп бу. Горурланырлык гармунчыларны күрү, аларның уйнауларын тыңлау  үзе бер зур вакыйга. Киләчәген, авылның иртәгәсен кайгырткан якташларыбызга зур рәхмәт. Бик матур бәйрәм бүген,-диде ул. Ирек Закиров  әлеге бәйрәмнең киләчәге булуын, киләсе елларга кулына гармун тоткан, көй сузырга теләге булганнарның катнашуларын теләвен әйтте.

Аннан мәйданда бәйрәмне ачу тантанасы башланды. Мәйданга гармун көйләрен сузып гармунчылар керде. Мәдәни хезмәткәрләре җырлы-биюле тамаша күрсәтте. 

Төрле уеннар, спорт ярышлары башланды. Көрәшчеләр бил алышты.